वाशिम तहसीलमध्ये महात्मा ज्योतिराव फुले महसूल लोक अदालत ४८ प्रकरणांची सुनावणी; ९ प्रकरणांत तडजोड ६३ शेतकऱ्यांना लाभ

 

साप्ताहिक सागर आदित्य 

⚖️ वाशिम तहसीलमध्ये महात्मा ज्योतिराव फुले महसूल लोक अदालत

४८ प्रकरणांची सुनावणी; ९ प्रकरणांत तडजोड

६३ शेतकऱ्यांना लाभ

📍 वाशिम,  : महसूल व वन विभाग, महाराष्ट्र शासनाच्या शासन निर्णयानुसार राबविण्यात येत असलेल्या महात्मा ज्योतिराव फुले महसूल लोक अदालत अभियानांतर्गत आज दि. ५ ऑक्टोबर रोजी तहसील कार्यालय, वाशिम येथील सभागृहात महसूल लोक अदालतीचे आयोजन करण्यात आले. उपविभागीय अधिकारी वैशाली देवकर यांच्या अध्यक्षतेखाली झालेल्या या लोक अदालतीत विविध स्वरूपाची एकूण ४८ प्रकरणे सुनावणीसाठी ठेवण्यात आली होती.

🧾 सुनावणीदरम्यान संबंधित पक्षकारांचे म्हणणे ऐकून घेण्यात आले. परस्पर सामंजस्य व तडजोडीने प्रकरणे निकाली काढण्याच्या दृष्टीने कार्यवाही करण्यात आली. सुनावणीअंती एकूण ९ प्रकरणांमध्ये तडजोड घडवून आणण्यात यश आले. यामध्ये रस्त्याबाबतची ४ प्रकरणे आणि इतर जमिनीच्या वादासंबंधी ५ प्रकरणांचा समावेश आहे.

🌾 या ९ प्रकरणांमध्ये संबंधित पक्षकारांमध्ये सामंजस्य व तडजोड घडवून आणून प्रकरणे निकाली काढण्यात आली असून, एकूण ६३ शेतकरी बांधवांना याचा लाभ झाला आहे. उर्वरित प्रकरणांबाबत प्रचलित नियमांनुसार पुढील कार्यवाही करण्याचे निर्देश देण्यात आले.

⚖️ महसूल विभागाशी संबंधित प्रकरणांमध्ये नागरिकांना सुलभ, पारदर्शक व जलद न्याय मिळावा, हा महसूल लोक अदालत अभियानाचा उद्देश आहे. या अनुषंगाने पक्षकारांना त्यांच्या प्रकरणांचे तातडीने व सामंजस्याने निराकरण करण्याबाबत मार्गदर्शन करण्यात आले.

📅 महसूल लोक अदालत अभियान १ सप्टेंबर २०२६ ते ३१ मार्च २०२७ या कालावधीत राबविण्यात येणार आहे.

#महात्मा_ज्योतिराव_फुले_महसूल_लोक_अदालत #महसूल_लोक_अदालत #महसूल_विभाग #वाशिम #शेतकरी #न्याय #महसूल_लोकअदालत