जिल्ह्यात सण-उत्सवांच्या काळात ध्वनी प्रदूषणावर कडक निर्बंध ⚠️ नियम मोडल्यास ध्वनीक्षेपक जप्त करून कायदेशीर कारवाई होणार

 

साप्ताहिक सागर आदित्य 

🔊🚨 जिल्ह्यात सण-उत्सवांच्या काळात ध्वनी प्रदूषणावर कडक निर्बंध

⚠️ नियम मोडल्यास ध्वनीक्षेपक जप्त करून कायदेशीर कारवाई होणार

👮 पोलीस अधीक्षक निकेश खाटमोडे-पाटील

📍 वाशिम,  (जिमाका) : जिल्ह्यात साजऱ्या होणाऱ्या गणेशोत्सव, आगामी काळात नवरात्रोत्सव, दसरा आणि धम्मचक्र प्रवर्तन दिन या सण-उत्सवांच्या कालावधीत सार्वजनिक शांतता, नागरिकांचे आरोग्य आणि कायदा व सुव्यवस्था अबाधित राखण्यासाठी पोलीस प्रशासनाने महत्त्वपूर्ण निर्णय घेतला आहे.

पोलीस अधीक्षक निकेश खाटमोडे-पाटील यांनी महाराष्ट्र पोलीस अधिनियम १९५१ चे कलम ३६ व कलम ३८ (१) अन्वये विशेष मनाई व नियमन आदेश जारी केले आहेत. सदर आदेश २३ सप्टेंबर २०२६ रोजी मध्यरात्री ००:०१ वाजेपासून ते २२ ऑक्टोबर २०२६ रोजी रात्री २४:०० वाजेपर्यंत वाशिम जिल्ह्याच्या संपूर्ण हद्दीत प्रभावी राहतील.

🔇 ध्वनीक्षेपकासाठी पूर्वपरवानगी बंधनकारक

जिल्ह्यात विविध धार्मिक, सांस्कृतिक व सार्वजनिक कार्यक्रम तसेच मिरवणुकींचे आयोजन केले जाते. या काळात मोठ्या आवाजात ध्वनीक्षेपक, लाऊडस्पिकर व ॲम्प्लीटफायरचा वापर केल्यास सर्वसामान्य नागरिक, ज्येष्ठ नागरिक, लहान मुले, विद्यार्थी व रुग्णांच्या आरोग्यास तीव्र त्रास होऊन अडथळा निर्माण होतो. रुग्णालय, शैक्षणिक संस्था व संवेदनशील क्षेत्रांमधील शांतता भंग होऊन कायदा व सुव्यवस्थेचा प्रश्न निर्माण होऊ नये, तसेच सर्वोच्च न्यायालय व उच्च न्यायालयाच्या ध्वनी प्रदूषणाबाबतच्या आदेशांचे तंतोतंत पालन व्हावे, यासाठी हे कडक निर्बंध लागू करण्यात आले आहेत.

जारी करण्यात आलेल्या आदेशानुसार, कोणत्याही सार्वजनिक ठिकाणी अथवा रस्त्यावर ध्वनीक्षेपक, लाऊडस्पिकर किंवा इतर ध्वनी निर्माण करणाऱ्या उपकरणांचा वापर करण्यासाठी सक्षम पोलीस अधिकाऱ्यांची पूर्वपरवानगी घेणे बंधनकारक राहील. परवानगी मिळाल्यानंतरही आयोजकांना 'द नॉईज पोल्युशन (रेग्युलेशन अँड कंट्रोल) रूल्स, २०००' मधील तरतुदींनुसार निर्धारित ध्वनी मर्यादांचे पालन करावे लागेल.

🌙 रात्री १० ते सकाळी ६ वाजेपर्यंत ध्वनीक्षेपकाला मनाई

रात्री २२:०० ते सकाळी ०६:०० या कालावधीत ध्वनीक्षेपक व लाऊडस्पिकर वापरण्यास सक्त मनाई करण्यात आली आहे (जिल्हाधिकारी यांनी शिथिल केलेले दिवस वगळून).

📊 क्षेत्रनिहाय अनुज्ञेय ध्वनी मर्यादा

🏭 औद्योगिक क्षेत्र : दिवसा ७५ व रात्री ७० डेसिबल

🏪 वाणिज्य क्षेत्र : दिवसा ६५ व रात्री ५५ डेसिबल

🏠 निवासी क्षेत्र : दिवसा ५५ व रात्री ४५ डेसिबल

🤫 शांतता क्षेत्र : दिवसा ५० व रात्री ४० डेसिबल

शासनाने क्षेत्रनिहाय ठरवून दिलेल्या मर्यादेनुसार एवढीच कमाल ध्वनी तीव्रता अनुज्ञेय असेल. तसेच रुग्णालये, शाळा, महाविद्यालये व न्यायालये यांसारख्या अधिसूचित शांतता क्षेत्राच्या परिसरात या नियमांचे काटेकोर पालन करणे अनिवार्य राहील.

⚖️ नियमांचे उल्लंघन झाल्यास तात्काळ कारवाई

ध्वनी प्रदूषणाबाबत तक्रार प्राप्त झाल्यास अथवा नियमांचे उल्लंघन आढळल्यास पोलीस अधिकारी तात्काळ घटनास्थळी जाऊन परिस्थितीची पाहणी करून कारवाई करतील. आदेशाचा भंग करणाऱ्यांविरुद्ध महाराष्ट्र पोलीस अधिनियम १९५१ चे कलम १३४ व १३६ अन्वये कायदेशीर गुन्हे दाखल केले जातील. तसेच कलम ७० अन्वये ध्वनीक्षेपकाचे संपूर्ण साहित्य व उपकरणे जप्त केली जातील.

🔴 वारंवार उल्लंघन करणाऱ्या आयोजकांची परवानगी रद्द करण्याबाबत कडक कारवाई केली जाईल, असा इशारा पोलीस प्रशासनाने दिला आहे.

🙏 सण-उत्सव शांततेत व उत्साहात साजरे करण्याचे आवाहन

जिल्ह्यातील सर्व सार्वजनिक उत्सव मंडळे, आयोजक व नागरिकांनी शासकीय नियमांचे आणि ध्वनी मर्यादांचे काटेकोर पालन करून पोलीस प्रशासनास सहकार्य करावे आणि सर्व सण-उत्सव शांततेत व उत्साहात साजरे करावेत, असे आवाहन पोलीस अधीक्षक निकेश खाटमोडे-पाटील यांनी केले आहे.

#वाशिम #ध्वनीप्रदूषण #गणेशोत्सव #नवरात्रोत्सव #दसरा #धम्मचक्रप्रवर्तनदिन #ध्वनीक्षेपक #लाऊडस्पिकर #NoisePollution #Washim #PoliceAdministration