सेवा संकल्प अभियानातून मालेगाव, डोंगरगाव व रामगाव येथे शेतकऱ्यांना मार्गदर्शन 🌾

साप्ताहिक सागर आदित्य 

 🌾 सेवा संकल्प अभियानातून मालेगाव, डोंगरगाव व रामगाव येथे शेतकऱ्यांना मार्गदर्शन 🌾

नवीन लाभार्थी नोंदणीसाठी विशेष शिबिरे

📍 वाशिम,  : शासनाच्या वतीने १७ सप्टेंबर ते १७ ऑक्टोबर २०२६ या कालावधीत राबविण्यात येत असलेल्या ‘सेवा संकल्प अभियान’ अंतर्गत कृषी विभागाच्या विविध योजनांची माहिती व मार्गदर्शन शेतकऱ्यांपर्यंत पोहोचविण्यासाठी जिल्ह्यात विशेष शिबिरांचे आयोजन करण्यात येत आहे.

🌱 जिल्हा परिषद कृषी विभागामार्फत डॉ. बाबासाहेब आंबेडकर कृषी स्वावलंबन योजना आणि बिरसा मुंडा कृषी क्रांती योजना राबविण्यात येतात. या योजनांचा पात्र लाभार्थ्यांना लाभ मिळण्यासाठी आवश्यक मार्गदर्शन उपलब्ध करून देण्याच्या उद्देशाने कृषी विकास अधिकारी अभिजित देवगिरीकर यांनी जिल्ह्यातील सर्व पंचायत समिती स्तरावर विशेष शिबिरांचे नियोजन केले आहे.

📍 मालेगावात विविध घटकांची माहिती

पंचायत समिती मालेगाव येथे आयोजित मार्गदर्शन सभेत कृषी विस्तार अधिकारी संजय पडोळे यांनी उपस्थित शेतकऱ्यांना योजनेंतर्गत मिळणाऱ्या विविध लाभांची माहिती दिली. यामध्ये नवीन विहीर, विहीर दुरुस्ती, सोलार पंप, इलेक्ट्रिक मोटर पंप, ठिबक सिंचन संच, तुषार सिंचन संच आणि पाईपलाईन या घटकांचा समावेश आहे.

यावेळी सहायक गटविकास अधिकारी रमेश कंकाळ व सहायक प्रशासन अधिकारी सोंडकर यांची प्रमुख उपस्थिती होती. तालुक्यातील बहुसंख्य गावांमधील शेतकऱ्यांनी सभेला मोठ्या संख्येने उपस्थिती लावली.

📍 डोंगरगावात नवीन लाभार्थी नोंदणी

कारंजा लाड तालुक्यातील डोंगरगाव येथे ग्रामपंचायत प्रशासनाच्या सहकार्याने नवीन लाभार्थी नोंदणी व मार्गदर्शन शिबिर घेण्यात आले. कृषी विस्तार अधिकारी रवींद्र वाढनकर यांनी नवीन लाभार्थ्यांची नोंदणी प्रक्रिया तसेच निवड झालेल्या लाभार्थ्यांना मिळणाऱ्या लाभाबाबत सविस्तर मार्गदर्शन केले.

यावेळी सरपंच प्रमोद सातोटे, ग्रामपंचायत अधिकारी गजेंद्र पाखरे यांच्यासह परिसरातील शेतकरी मोठ्या संख्येने उपस्थित होते.

📍 रामगावात कागदपत्रे व तांत्रिक बाबींवर मार्गदर्शन

मंगरूळपीर तालुक्यातील मौजे रामगाव येथे ग्रामपंचायत प्रशासनाच्या सहकार्याने नवीन लाभार्थी नोंदणी अभियान राबविण्यात आले. कृषी विस्तार अधिकारी भागवत भुरकाडे यांनी दोन्ही योजनांसाठी नवीन नोंदणी करताना आवश्यक असलेली कागदपत्रे तसेच तांत्रिक बाबींविषयी शेतकऱ्यांना मार्गदर्शन केले.

यावेळी गावचे सरपंच व नागरिक मोठ्या संख्येने उपस्थित होते.

🌾 योजनांची माहिती, पात्र लाभार्थ्यांची नोंदणी आणि आवश्यक मार्गदर्शन शेतकऱ्यांपर्यंत पोहोचविण्यासाठी सेवा संकल्प अभियानांतर्गत विशेष शिबिरांचा उपक्रम राबविण्यात येत आहे.

#सेवासंकल्पअभियान #कृषीविभाग #शेतकरी #कृषीस्वावलंबन #कृषीक्रांती #लाभार्थीनोंदणी #मालेगाव #डोंगरगाव #रामगाव #वाशिम #सेवापरमोधर्म