मतदार यादी अचूक... लोकशाही अधिक सक्षम! विशेष सखोल मतदार यादी पुनरीक्षण मोहिमेत राजकीय पक्षांनी सक्रिय सहकार्य करावे : जिल्हाधिकारी योगेश कुंभेजकर

 

साप्ताहिक सागर आदित्य 

🗳️ मतदार यादी अचूक... लोकशाही अधिक सक्षम!

विशेष सखोल मतदार यादी पुनरीक्षण मोहिमेत राजकीय पक्षांनी सक्रिय सहकार्य करावे : जिल्हाधिकारी योगेश कुंभेजकर

भारत निवडणूक आयोगाच्या निर्देशानुसार वाशिम जिल्ह्यातील तिन्ही विधानसभा मतदारसंघांमध्ये विशेष सखोल मतदार यादी पुनरीक्षण (एसआयआर) कार्यक्रम प्रभावीपणे राबविण्यात येत आहे. या मोहिमेच्या अनुषंगाने जिल्हाधिकारी तथा जिल्हा निवडणूक अधिकारी योगेश कुंभेजकर यांच्या अध्यक्षतेखाली राजकीय पक्षांच्या पदाधिकारी व प्रतिनिधींची बैठक आयोजित करण्यात आली. बैठकीत भारत निवडणूक आयोगाने दि. ४ ऑगस्ट २०२६ रोजी जाहीर केलेल्या सुधारित कार्यक्रमाची सविस्तर माहिती देण्यात आली.

लोकशाही प्रक्रियेचा पाया असलेली मतदार यादी अधिक अचूक, अद्ययावत आणि विश्वासार्ह करण्यासाठी प्रशासनासोबत सर्व राजकीय पक्षांनी सक्रिय सहभाग नोंदवावा, असे आवाहन जिल्हाधिकारी श्री. कुंभेजकर यांनी यावेळी केले. विशेष सखोल पुनरीक्षण मोहिमेमुळे प्रत्येक पात्र मतदाराचा समावेश सुनिश्चित होण्यास मदत होणार असून, मतदार यादीतील आवश्यक दुरुस्त्याही वेळेत पूर्ण होतील, असे त्यांनी सांगितले.

बैठकीत आयोगाच्या सुधारित कार्यक्रमानुसार मतदान केंद्रस्तरीय अधिकारी (बीएलओ) दि. ३० जून ते १७ ऑगस्ट २०२६ या कालावधीत घरभेटी घेऊन मतदारांची पडताळणी करणार असल्याची माहिती देण्यात आली. त्यानंतर दि. १७ ऑगस्ट रोजी मतदान केंद्रांचे सुसूत्रीकरण व पुनर्रचना करण्यात येईल. दि. २४ ऑगस्ट रोजी प्रारूप मतदार याद्यांचे प्रकाशन होईल. दि. २४ ऑगस्ट ते २३ सप्टेंबर या कालावधीत नागरिकांना दावे व हरकती सादर करता येतील. प्राप्त दावे व हरकतींचा निपटारा दि. २२ ऑक्टोबरपर्यंत करण्यात येणार असून, दि. २७ ऑक्टोबर २०२६ रोजी अंतिम मतदार याद्या प्रसिद्ध केल्या जाणार आहेत.

बैठकीत विधानसभा मतदारसंघनिहाय गणनापत्रक वितरण तसेच डिजिटायझेशनच्या कामाचा आढावा घेण्यात आला. अनुपस्थित, स्थलांतरित व मृत (एएसडी) मतदारांच्या पडताळणीदरम्यान बूथ लेव्हल एजंट (बीएलए) यांनी मतदान केंद्रस्तरीय अधिकारी (बीएलओ) यांना आवश्यक ते सहकार्य करून पडताळणीची प्रक्रिया अधिक प्रभावी करण्याचे आवाहन करण्यात आले.

जिल्ह्यात विविध राजकीय पक्षांकडून एकूण १,१०० बूथ लेव्हल एजंट (बीएलए) नियुक्त करणे अपेक्षित आहे. ज्या पक्षांकडून ही नियुक्ती अद्याप प्रलंबित आहे, त्यांनी ती तातडीने पूर्ण करावी, असे निर्देश जिल्हाधिकाऱ्यांनी दिले. बीएलए आणि बीएलओ यांच्या समन्वयातून मतदार यादी अधिक अचूक व विश्वासार्ह तयार होण्यास मोठी मदत होणार असल्याचेही त्यांनी स्पष्ट केले.

मतदार गणना प्रपत्रांचे डिजिटायझेशन आणि आवश्यक पडताळणीचे काम जिल्हा प्रशासनाकडून युद्धपातळीवर सुरू असून, निर्धारित कालावधीत संपूर्ण प्रक्रिया पूर्ण करण्यासाठी सर्व संबंधित यंत्रणा समन्वयाने कार्यरत आहेत.

बैठकीला उपजिल्हा निवडणूक अधिकारी विरेंद्र जाधव, नायब तहसीलदार (निवडणूक) एस. एम. पढवे, सहायक महसूल अधिकारी (निवडणूक) रवि महाले तसेच  राजकीय पक्षांच्या प्रतिनिधींमध्ये

🔹 गजानन गोटे – तालुका अध्यक्ष, भारतीय राष्ट्रीय काँग्रेस

🔹 प्रा. जगनाथ धांडे – वंचित बहुजन आघाडी

🔹 महादेव सोळंके – प्रतिनिधी, भारतीय राष्ट्रीय काँग्रेस

🔹 रमेश गोटे – तालुका अध्यक्ष, राष्ट्रवादी काँग्रेस (शरदचंद्र पवार पक्ष)

🔹 धनंजय रणखांब – जिल्हा उपाध्यक्ष, भारतीय जनता पक्ष

यांनी बैठकीत सहभाग नोंदवून विविध विषयांवर चर्चा केली. 

🇮🇳 अचूक मतदार यादी ही सशक्त लोकशाहीची ओळख आहे. चला, प्रशासन, राजकीय पक्ष आणि नागरिक यांच्या संयुक्त सहभागातून विशेष सखोल मतदार यादी पुनरीक्षण मोहीम यशस्वी करूया.

#मतदारयादी #विशेषसखोलपुनरीक्षण #SIR2026 #लोकशाही #भारतनिवडणूकआयोग #वाशिम #Washim #BLO #BLA #जिल्हाप्रशासनवाशिम #JIMAKA #Maharashtra #ElectionCommission