🚨 बेकायदेशीर गर्भलिंग निदानाची माहिती '१०४' वर द्या विश्वसनीय माहितीदारास शासनाच्या नियमानुसार १ लाख रुपयांचे बक्षीस

साप्ताहिक सागर आदित्य 

 🚨 बेकायदेशीर गर्भलिंग निदानाची माहिती '१०४' वर द्या

विश्वसनीय माहितीदारास शासनाच्या नियमानुसार १ लाख रुपयांचे बक्षीस

पीसीपीएनडीटी सल्लागार समितीची बैठक जिल्हा शल्यचिकित्सक डॉ. अनिल कावरखे यांच्या अध्यक्षतेखाली संपन्न झाली. बैठकीत पीसीपीएनडीटी कायद्याच्या प्रभावी अंमलबजावणीचा आढावा घेण्यात आला तसेच गर्भलिंग निदान व कन्या भ्रूणहत्येसारख्या बेकायदेशीर प्रकारांना प्रतिबंध करण्यासाठी विविध उपाययोजनांवर चर्चा करण्यात आली.

 "मुलगी वाचविणे ही केवळ शासनाची नव्हे, तर संपूर्ण समाजाची सामूहिक जबाबदारी आहे. गर्भलिंग निदानासारख्या बेकायदेशीर प्रकारांविरुद्ध प्रत्येक नागरिकाने सजग राहून माहिती द्यावी. एका जबाबदार माहितीमुळे एका निष्पाप मुलीचा जीव वाचू शकतो."

_जिल्हाधिकारी तथा जिल्हादंडाधिकारी योगेश कुंभेजकर

 "स्त्री-पुरुष लिंग गुणोत्तर संतुलित राखण्यासाठी जनजागृतीबरोबरच नागरिकांचा सक्रिय सहभाग अत्यंत आवश्यक आहे. समाजातील प्रत्येक घटकाने या अभियानात सक्रिय सहभाग नोंदवावा."

_जिल्हा परिषद, वाशिमचे मुख्य कार्यकारी अधिकारी अर्पित चौहान

 "पीसीपीएनडीटी कायद्यांतर्गत गर्भलिंग निदान हा गंभीर व दंडनीय गुन्हा आहे. विश्वसनीय माहितीच्या आधारे संबंधित व्यक्तीविरुद्ध गुन्हा दाखल होऊन कायदेशीर कारवाई झाल्यानंतर पात्र माहितीदारास शासनाच्या नियमानुसार १ लाख रुपयांचे बक्षीस देण्यात येईल."

_जिल्हा शल्यचिकित्सक डॉ. अनिल कावरखे

📞 गर्भलिंग निदान, कन्या भ्रूणहत्या किंवा पीसीपीएनडीटी कायद्याचे उल्लंघन होत असल्याची माहिती असल्यास १०४ या राज्यस्तरीय आरोग्य सहाय्य क्रमांकावर किंवा १८०० २३३ ४४७५ या टोल-फ्री क्रमांकावर संपर्क साधा.

🔒 माहितीदाराची ओळख पूर्णपणे गोपनीय ठेवण्यात येईल.

बैठकीस अतिरिक्त जिल्हा शल्यचिकित्सक डॉ. अविनाश पुरी, बालकल्याण समितीच्या अध्यक्षा डॉ. अलका मकासरे, डॉ. जया बिबेकर, डॉ. शिवनंदा आमले आणि डॉ. जयकिशन बाहेती आदींची प्रमुख उपस्थिती होती.

चला, कन्या भ्रूणहत्यामुक्त समाज घडविण्यासाठी सजग नागरिक म्हणून पुढाकार घेऊया.