जि.प. प्रा. शाळा वाकापुर येथे महात्मा फुले जयंती उत्साहात साजरी

साप्ताहिक सागर आदित्य 

 जि.प. प्रा. शाळा वाकापुर येथे महात्मा फुले जयंती उत्साहात साजरी

 जि.प. प्राथमिक शाळा वाकापुर येथे महात्मा ज्योतिराव फुले यांच्या जयंतीनिमित्त विशेष कार्यक्रम अत्यंत उत्साहपूर्ण व प्रेरणादायी वातावरणात संपन्न झाला. सामाजिक परिवर्तनाचे अग्रदूत, शिक्षणाचे महत्त्व पटवून देणारे महान विचारवंत महात्मा फुले यांच्या कार्याची उजळणी करत विद्यार्थ्यांमध्ये सामाजिक जाणीव व शिक्षणाविषयी आवड निर्माण करण्याचा प्रयत्न या कार्यक्रमातून करण्यात आला.

कार्यक्रमाच्या अध्यक्षस्थानी शाळा व्यवस्थापन समितीचे अध्यक्ष विनोद वानखेडे होते. प्रमुख पाहुणे म्हणून शाळेचे मुख्याध्यापक पाचपिले सर तसेच रजनिकांत राजाराम वानखेडे उपस्थित होते. कार्यक्रमाची सुरुवात महात्मा फुले यांच्या प्रतिमेस पुष्पहार अर्पण करून व दीपप्रज्वलनाने करण्यात आली. यावेळी उपस्थित मान्यवरांनी महात्मा फुले यांच्या कार्याला अभिवादन करत त्यांच्या विचारांचे स्मरण केले.

कार्यक्रमाचे प्रास्ताविक नागुलकर सर यांनी केले. त्यांनी आपल्या मनोगतातून महात्मा फुले यांच्या जीवनकार्याचा आढावा घेत विद्यार्थ्यांना त्यांच्या विचारांची प्रेरणा घेण्याचे आवाहन केले. त्यांनी सांगितले की, महात्मा फुले यांनी शिक्षणाचा प्रसार करून समाजातील दुर्बल घटकांना न्याय मिळवून दिला. त्यांनी अंधश्रद्धा, जातिभेद यांविरुद्ध लढा देत समानतेचा संदेश दिला. त्यामुळे विद्यार्थ्यांनी त्यांच्या विचारांचा अंगीकार करून समाजासाठी कार्य करण्याची प्रेरणा घ्यावी, असे त्यांनी नमूद केले.

यानंतर रजनिकांत वानखेडे यांनी विद्यार्थ्यांना मार्गदर्शन करताना आदर्श विद्यार्थी कसा असावा यावर सविस्तर भाष्य केले. त्यांनी विद्यार्थ्यांना नियमित अभ्यास, शिस्त, वेळेचे नियोजन व शिक्षकांचा आदर या गुणांचे महत्त्व पटवून दिले. . महात्मा फुले आणि सावित्रीबाई फुले यांनी समाजातील वंचित घटकांसाठी केलेल्या कार्याचा आदर्श ठेवून विद्यार्थ्यांनी शिक्षणात प्रगती साधावी, असे त्यांनी सांगितले.

कार्यक्रमात काही विद्यार्थ्यांनीही महात्मा फुले यांच्या प्रतिमेचे पुजन केले

या कार्यक्रमास अंगणवाडी सेविका कल्पना वानखेडे, मदतनिस शारदा पाटील, संतोष बचाटे तसेच शाळा व्यवस्थापन समितीचे सर्व सदस्य, पालकवर्ग व ग्रामस्थ  उपस्थित होते. 

कार्यक्रमाचे सुत्रसंचालन कल्पना वानखेडे यांनी प्रभावीपणे पार पाडले. शेवटी कार्यक्रमाचे आभार प्रदर्शन मुख्याध्यापक पाचपिले सर यांनी केले. त्यांनी सर्व मान्यवर, शिक्षक, विद्यार्थी व उपस्थितांचे मनःपूर्वक आभार मानले तसेच भविष्यातही अशा उपक्रमांद्वारे विद्यार्थ्यांना प्रेरणा देत राहण्याचा संकल्प व्यक्त केला.

एकूणच, हा कार्यक्रम विद्यार्थ्यांसाठी अत्यंत प्रेरणादायी, ज्ञानवर्धक व उत्साहवर्धक ठरला. महात्मा फुले यांच्या महान विचारांची रुजवण विद्यार्थ्यांच्या मनामध्ये होत असून, शिक्षणाच्या माध्यमातून समाज परिवर्तनाची दिशा मिळत असल्याचे या कार्यक्रमातून स्पष्ट झाले.