ऑनलाईन रोजगार मेळाव्यात 160 पेक्षा जास्त रिक्त पदांवर संधी युवक युवतींनी मेळाव्यात सहभागी व्हावे

 साप्ताहिक सागर आदित्य 

ऑनलाईन रोजगार मेळाव्यात

160 पेक्षा जास्त रिक्त पदांवर संधी

युवक युवतींनी मेळाव्यात सहभागी व्हावे

    वाशिम, : जिल्हयातील नोकरी/रोजगार इच्छूक उमेदवारांना नोकरीच्या संधी प्राप्त व्हाव्यात या उद्देशाने जिल्हा कौशल्य विकास, रोजगार व उद्योजकता मार्गदर्शन केंद्र, वाशिमच्या वतीने ३१ जुलैपर्यंत ऑनलाईन रोजगार मेळाव्याचे आयोजन करण्यात आले आहे. या मेळाव्यात टेक्नोक्राप्ट फॅशन लिमीटेड, अमरावती, मटॅलेंट सेतु प्रा. लि. पुणे, वर्क फोर्स प्रा.लि. पूणे व रवि पाटील ट्रॅक्टर्स, वाशिम आदी नामांकित कंपनी/उद्योगाकडील उद्योजक व त्यांचे प्रतिनिधी मुलाखतीद्वारे नोकरी इच्छुक उमेदवारांना खाजगी नोकरी/रोजगार देण्यासाठी सहभागी होत आहे. यासाठी इयत्ता १० वी, १२ वी, आय.टी.आय. (इलेक्ट्रॉनिक्स ट्रेड), पदवीधर (कला/वाणिज्य/विज्ञान), इंजिनिअरींग डिप्लोमा इत्यादी शैक्षणिक पात्रता असणे आवश्यक आहे. यासाठी वयोमर्यादा १८ ते ४५ वर्षादरम्यान असावी. युवक-युवती उमेदवारांच्या मुलाखती घेण्यात येऊन विविध प्रकारच्या पदनामांकरीता १६० संख्येपेक्षा जास्त रिक्त पदांवर रोजगार मिळवण्याची संधी जिल्हयातील नोकरी इच्छुक उमेदवारांना याव्दारे प्राप्त होणार आहे.

        जिल्हयातील रोजगार इच्छुक स्त्री/पुरुष उमेदवारांना www.mahaswayam.gov.in या वेबपोर्टलवर ऑनलाईन पध्दतीने विविध पदासाठी शैक्षणिक पात्रतेनुसार पसंतीक्रम देत सहभागी होता येणार आहे. ऑनलाईन रोजगार मेळाव्यामध्ये सहभागी होणाऱ्या उमेदवारांना त्यांचेकडील सेवायोजन कार्डच्या युझरनेम व पासवर्ड मधुन मेळाव्यात सहभागी होता येईल. या रोजगार मेळाव्यात ऑनलाईन पध्दतीने सहभागी होण्यासाठी आपणाकडे एम्प्लॉयमेंट कार्डमधील युझरनेम व पासवर्ड असावे. नसल्यास www.mahaswayam.gov.in या वेबपोर्टलवरील Job Seeker वरील Register वरुन युझरनेम व पासवर्ड मिळवावा. त्यानंतर Job Seeker च्या विंडोमध्ये लॉगीन करून डाव्या बाजुकडील पंडीत दीनदयाळ उपाध्याय जॉब फेअरवर क्लीक करावे. येथे वाशिम जिल्हा निवडुन त्यातील WASHIM JOB FAIR 1 मध्ये नमुद पात्रतेनुसारच्या पदांवर अप्लाय करावे. त्यावेळी Applied असा मेसेज दिसेल. या पध्दतीने आपण या ऑनलाईन मेळाव्यात सहभागी झालेले असाल. काही अडचन असल्यास जिल्हा कौशल्य विकास, रोजगार व उद्योजकता मार्गदर्शन केंद्राच्या ०७२५२-२३१४९४ या दूरध्वनी क्रमांकावर संपर्क करावा. असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राच्या सहायक आयुक्त  सुनंदा बजाज यांनी केले आहे.