साप्ताहिक सागर आदित्य/

गॅस सिलेंडरच्या किंमतीत मोठा बदल, जाणून घ्या काय आहेत सुधारित दर!

मुंबई - सर्वसामान्य नागरिक वाढत्या महागाईमुळे त्रस्त आहेत. अशातच, १ मार्च रोजी एलपीजी सिलिंडरचे नवीन दर जाहीर करण्यात आले. गेल्या काही महिन्यांपासून घरगुती LPG सिलिंडरच्या किमतीत फार काही बदल झालेले नाहीत. मात्र, सध्याच्या काळात कच्च्या तेलाच्या किमती प्रति बॅरल १०२  डॉलरच्या पुढे गेल्या आहेत. त्यामुळे व्यावसायिक सिलेंडरच्या किमतीत लक्षणीय बदल झाला. ऑक्टोबर २०२१ ते १ फेब्रुवारी २०२२ दरम्यान व्यावसायिक सिलिंडरच्या किंमतीत १७० रुपयांनी वाढ झाली आहे. १ ऑक्टोबर रोजी दिल्लीत व्यावसायिक सिलेंडरची किंमत १७३६ रुपये होती. नोव्हेंबरमध्ये ते २००० आणि डिसेंबरमध्ये २१०१ रुपये झाले. यानंतर, जानेवारीमध्ये ते पुन्हा स्वस्त झाले. फेब्रुवारी २०२२ मध्ये ते स्वस्त झाले आणि १९०७ रुपयांवर आले. सध्याच्या जाहीर झालेल्या नवीन दारांमधील बदल लक्षात घेता नवीन सिलिंडरचे दर तब्बल १०५ रुपयांनी वाढले आहेत. व्यावसायिक सिलिंडरमध्ये ही वाढ करण्यात आली आहे. महत्वाचं म्हणजे, ७ मार्चनंतर घरगुती एलपीजी सिलेंडर देखील महाग होण्याची शक्यता आहे. कारण सध्या उत्तर प्रदेश विधानसभा निवडणुकीच्या सहाव्या टप्प्याचे मतदान ३ मार्चला आणि सातव्या टप्प्याचे मतदान ७ मार्चला आहे. अशा परिस्थितीत ७ मार्चनंतर सिलिंडरच्या किंमती वाढण्याची शक्यता निर्माण झाली आहे. हाती आलेल्या माहितीनुसार, १९ किलोचा LPG सिलेंडर १ मार्चपासून दिल्लीत १९०७ रुपयांऐवजी २०१२ रुपयांना मिळणार आहे. कोलकात्यात आता १९८७ ऐवजी २०९५ रुपयांना मिळणार आहे, तर मुंबईत त्याची किंमत आता १८५७ रुपयांवरून 1963 रुपयांपर्यंत वाढली आहे. दरम्यान, देशातील मुख्य पाच राज्यांतील विधानसभा निवडणुकी जाहीर झाल्या आहेत. त्यामुळे विनाअनुदानित गॅस सिलिंडरच्या किमतीत अनेक महिन्यांपासून दिलासा मिळाला आहे. अगदी 6 ऑक्टोबर 2021 पासून घरगुती एलपीजी सिलिंडरच्या किमतीत कच्च्या तेलाच्या किमती $ 102 प्रति बॅरल अशी वाढ झाली, तरीही कोणताही बदल झालेला नाही. अशा परिस्थितीत निवडणुकीनंतर म्हणजेच 7 मार्चनंतर गॅसच्या दरात प्रति सिलेंडर 100 ते 200 रुपयांनी वाढ होण्याची भीती व्यक्त केली जात आहे.