श्री. बाकलीवाल विद्यालयातील एनसीसी विद्यार्थ्यांचा मतदार जनजागृतीसाठी स्तुत्य आणि प्रेरणादायी पुढाकार

 

श्री. बाकलीवाल विद्यालयातील एनसीसी विद्यार्थ्यांचा मतदार जनजागृतीसाठी स्तुत्य आणि प्रेरणादायी पुढाकार

स्वीप  उपक्रमांतर्गत पत्रलेखन स्पर्धा उत्साहात 

वाशिम, नगर परिषद/नगरपंचायत सार्वत्रिक निवडणूक २०२५ पारदर्शक, शांततापूर्ण आणि अधिकाधिक मतदारांच्या सहभागातून पार पडावी, यासाठी जिल्हा प्रशासनाकडून विविध जनजागृती उपक्रम राबवले जात आहेत. याच अनुषंगाने स्वीप  उपक्रमांतर्गत शहरातील शैक्षणिक संस्था देखील पुढाकार घेत असून, त्यात श्री. बाकलीवाल विद्यालयातील एनसीसी विद्यार्थ्यांनी मतदार जागृतीसाठी राबवलेला उपक्रम विशेष उठून दिसला आहे.

विद्यालयात आयोजित पत्रलेखन स्पर्धेत विद्यार्थ्यांनी आपल्या पालकांना मतदार म्हणून सजग राहण्याचे आवाहन करणारी अनेक हृदयस्पर्शी, संवेदनशील आणि आशयघन पत्रे लिहिली. प्रत्येक पत्रातून ‘प्रिय आई–बाबा, आपल्या शहरासाठी व माझ्या उज्ज्वल भविष्यासाठी तुम्ही मतदान जरूर करा’ असा भावनिक आणि थेट संदेश उमटत असल्याने हा उपक्रम अधिक परिणामकारक ठरला आहे.

तरुणाईच्या भावविश्वातून उमटणारा हा मतदानाचा संदेश कुटुंबापर्यंत पोहोचल्याने मतदान प्रक्रियेविषयी अधिक सकारात्मक वातावरण निर्माण होत असल्याचे शिक्षकांनी सांगितले.

एनसीसी विद्यार्थ्यांनी केवळ पत्रलेखनापुरते न राहता मतदानाचे महत्त्व समजावून सांगणारे छोटे मार्गदर्शक संदेश, पोस्टर आणि हस्तलिखित पत्रके देखील तयार केली. काही विद्यार्थ्यांनी परिसरात जनजागृती रॅली काढत लोकांना ‘मतदान हा हक्कच नव्हे तर कर्तव्य’ असल्याचे पटवून दिले.

शालेय स्तरावरून असा उपक्रम राबविला जाणे ही लोकशाही मजबूत करण्याच्या दिशेने एक सकारात्मक आणि दूरदर्शी पाऊल असल्याचे मुख्याध्यापकांनी सांगितले.

विद्यार्थ्यांच्या या सहभागामुळे घराघरातून जागरूकतेची नवी लाट निर्माण होत असून, कुटुंबातील प्रत्येक सदस्याने मतदानासाठी पुढे यावे, असा भावनिक संदेश या उपक्रमातून पोहोचला आहे.

अधिकाधिक मतदारांनी उत्साहाने सहभागी व्हावे, हा विद्यार्थ्यांचा प्रयत्न निश्चितच प्रशंसनीय ठरत आहे.